Heb 3 | APZ | STEP | Nje a'amufo, sekwo Anɨtuye mehomi ne imo'nɨmentohofo soku, Anɨtu ahwomomo humaso sohwo sekumo sehwosopo'mentisofoho. Jisas kako Anɨtuye hungkuno uyohojɨku'mofo sohwo kako nakwo Anɨtu'nji humayo'ne hulɨ'mokonesyohumaso so'no nakwoe wonyo wae enaofo'ne syoho ma'mentisofoho. Oso huhwo sohumo sɨmeho hi'ntnnono uyɨwo'nɨngkuhwone oso'no kakoe a'amu ne'nwoho lɨwo'nɨngkuhwonefoho. I oso'no nakwo Jisasɨmne'no huno ne'no syofɨsyɨhwasi nakwo Jisas kakine'no huno engo wotɨpemehwano.

Hebrews 3

Jisasɨye yofe engoso Mousesɨye yofemo yakolo'nnyofoho.

1 Nje a'amufo, sekwo Anɨtuye mehomi ne imo'nɨmentohofo soku, Anɨtu ahwomomo humaso sohwo sekumo sehwosopo'mentisofoho. Jisas kako Anɨtuye hungkuno uyohojɨku'mofo sohwo kako nakwo Anɨtu'nji humayo'ne hulɨ'mokonesyohumaso so'no nakwoe wonyo wae enaofo'ne syoho ma'mentisofoho. Oso huhwo sohumo sɨmeho hi'ntnnono uyɨwo'nɨngkuhwone oso'no kakoe a'amu ne'nwoho lɨwo'nɨngkuhwonefoho. I oso'no nakwo Jisasɨmne'no huno ne'no syofɨsyɨhwasi nakwo Jisas kakine'no huno engo wotɨpemehwano. 2 Anɨtu oso syoho hiso'no Jisasɨmo uhwosopeehonɨngki Jisas syoho hiso hofiyo esojwao'mentisofoho. Sɨmo'mo Mouses kako a'amu Isɨlael somo Anɨtumo ufohi'nyone hulɨ'mokosyohumamentisofoho. Tɨfi sohonta Jisas huhwo oso syoho Mouses hopaso kako ma'mentisofoho. 3 Nakwo ango wopɨngo uhwonantaneso ango wopɨngo homo somo yofe engo mulɨwo'nɨngkuhwonetaho. Awonoho. Nakwo ango kakwo'yohwo sohune'no yofe engo mulɨwo'nɨngkuhwono. Oso'no Jisas kako nakumo Anɨtuye ango pa'nyo namokumentiso hn'nwiye ango kakwo'yohwo sohwo Jisasɨyoho. Mouses kako ango homo somo mokosyohumayo'nohino hweho. Jisas kako ango homo somo kakwo'yohweho. Oso'no Jisas kakoe yofe engoso Mousesɨye yofe somo yakolo'nnyofoho. 4 Ango hopi'nonohinoso a'amu molɨwo'nɨngkohofofoho. I oso'no Anɨtu kako'nohino yo'mayo hopi'nono mtɨ'mokumentiso hweho. 5 Mouses Anɨtuye syoho ulohofiyo sohwo kako Anɨtuye hungkunomo tɨfi inɨngkawento Anɨtuye angomo wopɨngo mokosyohumamojo hweho. Anɨtu Mousesɨmo yo'mayo Anɨtu kako hwangku yoneso'no lutɨhwamentiso so'no Mouses a'amu somo lutɨhwamojo hweho. 6 I oso'no Jisas Kɨlais sohwo kako Anɨtuye syoho ulohofiyo hwo'maho. O'o, kako Anɨtuye Hwomu hweho. Jisas kako huhwo Anɨtuye hungkunomo inɨngkawento Anɨtuye ango hn'nɨmo wopɨngo nemokosyohumawo'nɨngkiso hweho. Oso'no nakwo kakoe ango hn'nwi Kɨlaisɨmo sɨmeho hi'ntnnono ne'no uyɨhwasi aho yokumpohn'nyo kemokosyohumehwasi nakwo kakine'no hontohumayo'manji oso'no nakwo kakoe ango hn'nwi ne'no nomolohinowentanɨngkuhwosi nakwo ne'no nohumentɨhwanefoho.

A'amu Anɨtuye hungkunomo hwotoho fewo'nɨngkohofoso hofɨko usijo'no mohumafitnnefoho.

7 Anɨtuye Towahunofe mampahomo upo'nano. Ole nalohi,

Olohonta sekwo nje hungkunomo haloho upa'nɨfijo'manji sekwo hahn'nyo ikutoho.
8 Hohonta a'amu Isɨlaelɨso hofɨko Anɨtuye hungkunomo haloho upa'nontɨfi hahn'nyo yontɨfi hungkuno homo somo hwotoho hmmentohofofoho.
Hofɨko hwaho a'amu ane sopo nohumantɨfi Anɨtu nto'no monefo'mayo'njo iwo'nɨngkino hwosoho ntɨmotofofoho.
9 Seyakwosa osopo nohumentanɨngkofi soswofouti (40) uyakolofontanɨngki yo'mayo wopɨngo ngko utɨhwamentohe somo uhwonɨmotofofoho.
Hofɨko ko uhwonɨmotofoso hofɨko ngkimo sitofo ntɨmotofofoho.
10 Oso'no oso a'amu homo somne'no sɨmeho tohino nɨmnɨngkahonɨngki lɨmentoho,
A'amuso hofɨko nje yahinomo minɨngkayo'njo yontɨfi nom'ne honɨngkanomo usampewo'nɨngkohofofoho.
11 Oseso nje sɨmeho tohino nɨmnɨngkahonɨngki hungkuno yokumpohn'nyo ole lɨmentoho,
Nje usijo'no humayo yahinoso hofɨko motɨpemapitnnehofo. Nɨhu'no awonoho.
Anɨtu ose lɨmentisofoho.

A'amu Isɨlaelɨso hofɨko Anɨtuye hungkuno hwotoho hmmotofo pa'nyoso nakwo hwotoho fehwaloho.

12 Nje a'amufo, sekwo huno fɨsyafɨhupmno. Hwe fihwo kako sekwo'njopo humaso sohwo kako Anɨtu songo humaso sohumo sɨmeho hi'ntnnono muyo'njo ihwosi Anɨtumo nɨhu'nahone hohujo ikinjaofɨhwosi kako honɨngkano wonyomo sompefonoho. Oso'no sekwo nto'no uhwontohumano. 13 Sekwoe sɨkuno moi'wo mmo'nosojwaofe sohonta sekwo sɨkuno huhwo huhwi sekwoe senɨngkwa'wehwosafe hunomo Anɨtuye hungkuno so'no huno filanɨfohotopmno. Ose lɨfohotofɨkuji sekwo ufo'ma'nɨmno. Hwe fihwo sekwo'nji humaso osohumo honɨngkano wonyoso kakimo kompemotahwosi kako olo honɨngkano loso'no wopɨngofoho lɨhwosi Anɨtuye hungkunomo nɨhu'nahone hahn'nyo yonoho. 14 Sɨmo'mo nakwo Anɨtumo sɨmeho hi'ntnnono uyoma'mentɨhwoneso yokumpohn'nyo kemokosyohumentaso hn'nwi nakwo yokumpohn'nyo ne'no kemokosyohumayo'manji u Kɨlaisɨye yokumpohn'nyo so'nji kako yo'mayo mokosyohumaso so'nji ma'malohwono. 15 Nakwo huno nayohi, Anɨtuye hungkuno ole nalohi,

Olohonta sekwo nje hungkunomo haloho upa'nɨfijo'manji sekwo hahn'nyo ikutoho.
Hohonta a'amu Isɨlaelɨso hofɨko Anɨtuye hungkuno haloho upa'nontɨfi hahn'nyo yontɨfi hungkuno homo somo hwotoho hmmentohofofoho.
Anɨtu ose nalɨmentisofoho.

16 Hohonta Anɨtuye hungkunomne'no hahn'nyo tɨhwa imentohofoto. Hwe moya'mi Isɨlaelɨso Ijip mta'ni Mouses ipemotawomentisoso hahn'nyo imentohofofoho. 17 Anɨtu kakoe sɨmeho tohino umnyoso nowentanɨngki soswofouti (40) uyakolo'mentisofoho. Oso sɨmeho tohinoso tɨhumo uyɨmentono. A'amu honɨngkano wonyo yontɨfi oso hwaho a'amu anepo poyo pe'nɨmentohofo hofɨkoe pijafoso osopo wentanjo somne'no Anɨtuye sɨmeho tohino umnɨmentisofoho. 18 Anɨtu kako hungkuno yokumpohn'nyo ole-eso tɨhumne'no lɨmentono. Nje usijo'no humayo yahinoso hofɨko motɨpemapitnnehofo. Oseso tɨhumne'no lɨmentono. A'amu kakoe hungkunomo hwotoho fewo'nɨngkohofo somne'no lɨmentisofoho. 19 Oso'no nakwo huno ole nayohi, A'amu Anɨtumo sɨmeho hi'ntnnono muyo'njo yɨwo'nɨngkohofo so'no hofɨko Anɨtuye usijo'no humayo yahinoso motɨpemapitnnehofo.